Gedonkn zum Weihnachtsfriedn
An Friedn zu finden, des is oft net leicht,
vo Fehlan und Unfried is koana geeicht.
Fong ma im Kloanen, im engstn Kreis u,
weil so nur da Friedn erhoitn bleim ku.
In insan kloan Umkreis, im täglichen Lem,
söds oi Tog a friedliches Mitanond gem.
Mia brauchn koan Zwiespoit, koa Ausgrenzung net,
koa bösargtigs Denkn, koa feindschaftlichs Gred.
Lass ma des Urteiln, de Schlechtmocharei,
semma vo jegliche Foischheitn frei.
Koana is bessa und koana is mea,
lass ma doch jedn sei Achtung und Ea.
Gedicht von Kathi Kitzbichler